Wednesday, 31 August 2022 01:40

Higalaay Festival 2022 malinawo’ng gisaulog

Written by
HAPSAY ug malinawon ang pagsaulog sa kapistahan ni Sr. San Agustin basi sa report sa Cagayan de Oro City Police Office (COCPO) diin walay natala nga insidente atol sa gipahigayon nga mga core events sa Higalaay Festival 2022 sa tibuok bulan sa Agosto.
 
Atol sa usa ka radio interview, gipadayag ni PLTCOL Kitt Sereñas, COCPO Deputy Director for Operations, nga “generally peaceful” ang overall assessment sa tana’ng kalihokan nga gipahigayon alayon sa pista sa dakbayan.
Matud ni PTCOL Sereñas, walay natala nga dakong krimen ug mga krimen diha sa mga fiesta-related activities.
 
Dugang ni Sereñas nga mitala og pinakaubos nga daily average crime rate ang syudad nga anaa sa tulo matag adlaw lamang sa ikatulong semana ug pito matag adlaw sa ikaupat nga semana ning bulan.
 
Tungod niini mapasalamaton ang kapolisan sa suporta ug kooperasyon sa Kagay-anons ug sa katawhan sa pagbalik sa face-to-face celebration sa Higalaay Festival activities human sa duha ka tuig nga pandemya.
 
Mapasalamaton usab ang lokal nga kagamhanan ubos ni Mayor Rolando “Klarex” Uy ngadto sa COCPO nga gipangulohan ni Col. Aaron Mandia tungod sa hugot niining suporta sa ‘month-long’celebration diin gatosan ka mga miyembro sa PNP ang gi-deploy sa tanan kalihokan sa pista ning tuig. (SPPalen/CIO)