Tuesday, 06 September 2022 08:52

Covid-19 vaccination gipalapdan sa 26 ka brgy health centers

Written by
MUABOT sa 26 ka barangay health centers sa Cagayan de Oro ang abli karong semanaha sugod September 5 hangtud 9 alang sa halapad nga pagpamakuna batok COVID-19, pahibalo ni Dr. Ina Grace Chiu, National Immunization Program Medical Coordinator sa City Health Office.
 
Alang sa unang distrito, abli gikan alas-9:00 sa buntag hangtod alas-4:00 sa hapon ang mga health centers sa barangay Bayabas, Balulang, Bonbon, Bulua, Canitoan, Carmen, Iponan, Kauswagan main, NHA Kauswagan, Lumbia, Macanhan, Mambuaya, Patag ug Pagatpat.
 
Samtang sa segundo distrito, anaa usab ang barangay Agusan, Bugo, Camaman-an, Cugman, Gusa, Indahag, Lapasan main, Macasandig, Nazareth, Macabalan, Tablon ug Puerto.
 
Sa laing bahin, gidugang ni Dr. Chiu nga karong semanaha walay pagpamakuna sa first dose alang sa 5-11 anyos, sanglit ang nahibilin nga mga bakunang Pfizer gigahin alang sa mga bata nga ‘due’ ug ‘overdue’ na sa second doses.
 
Gawas sa mga health centers, padayon usab ang pagpamakuna sa mga fixed posts diha sa Limketkai mall, lunes hangtod huwebes, ug dominggo; SM CDO downtown premier sa adlawng biyernes, sabado ug domingo.
Padayon usab ang CHO sa pangpang-dawat sa mga requests alang sa office/company vaccination. (AGP-CIO)