MAPASALAMATON ang 43 ka mga pamilya nga nasunogan sa Purok 13, Baloy, Barangay Tablon ning syudad niadtong Septiyembre 9 human nakadawat og mga ayuda gikan sa city hall.
Sa adlaw mismo nahitabo ang trahedya, una nang midawat ang mga biktimang pamilya sa bugas, kitchen utensils ug sleeping linens gikan sa City Social Welfare and Development Department sa pagpangulo ni CSWD Officer Annie Tongson ug CSWD Executive Overseer Pastor Dimver Andales.
Dugang ayuda usab ang ilang nadawat gikan ni City Mayor Rolando 'Klarex' Uy ug kanhi bise mayor Kikang Uy nga gilangkoban sa food packs, tsinelas, banig, kaldero ug uban pa.
Kasamtangan anaa nagpuyo ang mga biktima diha sa Barangay Tablon covered court diin sila nakapahimulos usab og libreng collapsible tents gikan ni Senator Migz Zubiri. (NLB/CIO/Photos by Aicy Soriano/ CMO)