Friday, 16 September 2022 08:18

328 ka baktin, feeds ug vitamins gitunol sa DA sa mga hog raisers

Written by
MOKABAT 109 ka backyard hog raisers nga apektado sa African Swine fever (ASF) ang nakadawat matag usa og 3 ka baktin, 3 ka sako nga feeds, ingon man vitamins gikan sa Department of Agriculture Region 10 ug sa lokal nga kagamhanan sa Cagayan de Oro ubos sa administrasyon ni Mayor Klarex Uy, Biyernes, Septiyembre 16, 2022.
 
Ang maong mga recipients naggikan sa 19 ka barangay ning dakbayan isip 2nd batch sa Swine Sentinel Program sa Department of Agriculture Region 10, diin usa ang Cagayan de Oro nga napili sa DA alang sa maong programa karong tuiga.
 
May be an image of 1 person, sitting and standing
 
Ang maong distribusyon gipahigayon sa Barangay Mambuaya covered court nga gipangulohan ni DA OIC-Regional Executive Director Milo Delos Reyes, Mayor Rolando "Klarex" Uy, Maria Lourdes Sypieco, Senior Agriculturist/Focal Person, Livestock ug City Veterinarian Dr. Perla Asis, uban sa mga miyembro sa barangay council sa Mambuaya.
 
Ang mga kadagkuan sa DA-10 mipasabot nga tumong sa maong programa nga matabangan ang mga hog raisers nga mabalik ang ilang panginabuhian human sila naapektuhan sa ASF sa milabay’ng tuig.
Dugang pa sa ahensya nga obserbahan ug i-monitor sulod sa 40 ka adlaw ang mga baktin aron sa ingon mahibaloan kung negatibo na ba ang dakbayan sa ASF.
 
Sa iyang bahin, mipasalamat si Mayor Klarex Uy sa Department of Agriculture sa kanunay paglakip sa dakbayan sa mga programa sa ahensya, ilabina gayud kung kabahin pagsumpo sa ASF.
 
Hangyo pa sa Mayor sa katawhan nga makigtambayayong kanunay sa DA, APO ug City Veterinary Office aron molambo ang ilang mga programa sa gobyerno sa tuyo nga makatabang sa katawhan.
Kahinumduman nga 34 ka mga barangay sa Cagayan de Oro ang naigo sa African Swine Fever, diin gatusan ka mga backyard hog raisers ang naapektuhan. (AMTB-CIO/Photos by Aicy Soriano/CMO)