Hugot nga gipahinumduman ug giaghat ni Mayor Rolando `Klarex’ Uy ang 50 ka mga urban poor presidents sa syudad nga ipaabot ug ipahibalo kaniya ang kabahin sa ilang mga pangandoy ug tinguha alang sa resettlement program.
“Sayang ang inyong panagtagbo ug nasabutan sa mga meetings kung dili ninyo mapaabot sa hingtungdan nga lokal nga kagamhanan,” pamahayag ni Mayor Klarex atol sa general assembly sa Cagayan Federation of People’s Organization (CAFEDPO) Inc., adlaw’ng Sabado Sept. 24, nga gipahigayon sa city hall quadrangle.
Sa unang higayon, nasayran ni Mayor Klarex nga tinguha sa mga urban poor presidents ang onsite-resettlement apan wala nila kini napaabot sa mayor hinungdan nga wala usab nahatagan og aksyon ilabina nga wala siya nasayod kalabot sa maong tinguha.
Gipasabot sa mayor nga kinahanglan magmatinud-anon ang mga opisyales sa ilang mga tinguha pinaagi sa pagpahibalo sa ilang mga plano ngadto sa lokal nga kagamhanan.
“Nalipay ko nga nasayran nako ang inyong tinguha nga onsite-resettlement,” dugang ni Mayor Klarex.
Sa samang higayon, nanumpa ngadto kang Mayor Klarex ang bag-ong napili nga opisyales sa CAFEDPO pinangulohan sa ilang presidenti nga si Erlinda Oras.
Alayon niini, giaghat sa mayor ang CAFEDPO nga maghiusa ug ipatigbabaw ang kooperasyon aron magmalampuson ang tinguha sa ilang organisasyon. (ALR/CIO/Photos from CMO)