Tuesday, 27 September 2022 06:54

Pagbalik sa hagdanan gawas sa Cogon Mkt gihingusgan sa CEED

Written by
Masaligon ang mga kadagkuan sa City Economic Enterprises Department (CEED) nga ilang mapatuman ang nakahan-ay nga mga proyekto ug programa alang sa kalambuan sa kamerkaduhan ning syudad ubos sa administrasyon ni Mayor Rolando `Klarex’ Uy.
Kini human nagpadayag sa iyang suporta si Mayor Klarex atol sa panagtagbo sa mga managers sa merkado sa Cogon, Carmen, EWTPM ug Puerto sa buhatan sa mayor Lunes, Sept. 26.
 
Si CEED dep’t manager Marfe Dacoco mibutyag nga usa sa mga proyekto nga ilang ipatuman sa merkado sa Cogon mao ang pagbutang og balik sa hagdanan sa gawas nga bahin sa merkado padulong 2nd floor.
Usa kini sa gihangyo sa mga stall holders aron masayon na ang pagsaka sa mga mamalitay nga dili na mosulod pa sa merkado.
 
Matud pa ni Dacoco ibalik nila ang hagdanan apan dili na sama kaniadto nga nakalapas sa road-right-of way hinungdan nga naigo sa road clearing ug gipaguba ubos sa kamanduan sa Department of Interior & Local Government (DILG) sa nilabay’ng duha ka tuig.
 
Ang maong proyekto nga nagkantidad og kapin sa P700K diha ibutang sa dalan Yacapin nga bahin sa Cogon market, diin gilantaw nga dako kini og matabang sa mga mamaligyaay ilabina sa 2nd floor, dugang ni Dacoco.
 
Nagpasalamat usab si Dacoco ug mga kauban kang Mayor Klarex sa suporta niini alang sa katumanan sa mga proyekto ug programa sa CEED alang sa kaayohan sa mga mamaligyaay lakip mga mamalitay. (ALR/CIO/Photo from CEED)