Thursday, 16 March 2023 07:48

UNDERGROUND CABLES GIHINGUSGAN NI MAYOR KLAREX

Written by

Sa tinguha nga masugdan ang laraw nga underground cabling system, gihangyo ni Mayor Rolando `Klarex’ Uy ang probinsyal nga kagamhanan sa Misamis Oriental pinaagi ni Governor Peter Unabia nga magamit ang underground sa MisorTel.

“Ang pagtugot ni Governor Unabia mao ra gyud ang kalampusan niining tanan,” pamahayag ni Mayor Klarex atol sa ceremonial clean-up sa CDO-ICT Task Force “Klarex Nga Serbisyo sa Kable” nga gipahigayon sa Kiosko Kagawasan adlaw’ng Huwebes, Marso 16, 2023.

Matud sa mayor nga kung mosugot na si Gov. Unabia sugdan na dayon sa syudad ang proyekto ug mag-una kini sa A. Velez Street.

Gi-representahan ni Bise Mayor Rommel Maslog sa lungsod sa Talisayan si Gov. Unabia nga maoy pinasidunggang dinapit sa maong kalihokan kay aduna kini dinalian nga biyahi sa Cebu City. Hinuon, gipadayag ni Bise Mayor Maslog nga suportado ni Gov. Unabia ang mga panglantaw ni Mayor Klarex ilabina sa kalambuan alang sa kaayohan sa katawhan.

Samtang gipasabot usab ni Mayor Klarex nga ang pagtangtang ug paglimpyo sa kable nasugdan na sa milabay’ng administrasyon ug padayonon niya kini tungod kay makahatag kini og dakong kalambuan sa syudad.

Alayon niini, gipasalamatan ni Mayor Klarex si NTC Dir. Ted Buenavista kinsa hugot usab nga naningkamot nga mapatuman ang maong programa ug ingon man sa tanang mga partners ug miyembro sa task force. (ALR/CIO/Photos by Reynan Baylin/CIO)