Tuesday, 28 March 2023 23:56

‘SATISFACTORY’ ANG RESULTA SA SATISFACTION SURVEY SA BUSINESS PERMIT RENEWAL SA CITY HALL KARONG TUIGA

Written by
Satisfactory kon makatagbaw ang nahimong resulta sa satisfaction survey alayon sa tinuig nga business permit renewal sa city hall.
Kini human nakaangkon ang city hall og 85% satisfaction rating sa nahisgutang survey sugod Enero 3 hangtud Pebrero 28 ning tuig.
 
Atol sa "Ease of Doing Business" meeting karong adlawa, Marso 28, gibutyag ni Oxanna Custodio sa Trade and Investments Promotions Center kon ORO-TIPC nga 300 ka mga onsite business registrants, mga kliyente ug taxpayers ang miapil sa survey.
 
Ang maong client satisfaction survey nahisubay sa sumbanan sa Anti-Red Tape Authority kon ARTA pinasikad sa Memorandum Circular 2022-05 series of 2022 kon "Guidelines on the Implementation of Harmonized Client Satisfaction Measurement".
 
Sumala sa Business Permit Licensing Office (BPLO) nga mikabat sa 22,633 ka mga negosyo ang naka-renew o’ nakarehistro sa ilang business permit gikan Enero 3 hangtud Pebrero 28, mas taas og 28% kung itandi sa nakalabay’ng tuig nga anaa lamang sa 17,537.
 
Nasayran nga mikabat usab sa 1,387 ka mga bag-ong negosyo ang naglukat og business permit dinhi sa dakbayan karong tuiga. (GB/CIO)