Friday, 14 April 2023 01:15

MGA OPISYALES SA MALUNGON, SARANGGANI MIBISITA SA CDO ARON TUN-AN ANG ADOLESCENT HEALTH & DEV’T PROGRAM

Written by
Mainitong gidawat ni Mayor Rolando ‘Klarex’ Uy kagahapon, Abril 13, ang grupo ni Mayor Maria Theresa D. Constantino, municipal councilors ug mga opisyales sa kagamhanang lokal sa lungsod sa Malungon, Saranggani Province atol sa gihimong ‘learning visit’ aron tun-an ang pagpadagan sa syudad sa mga teen centers ug adolescent-friendly health facilities.
 
Kusganong gitutokan karon sa kagamhanang lokal sa dakbayan pinaagi sa pangpanguna sa Community Improvement Division - Adolescent Health and Development Program, City Health Office, Oro Youth, City Social Welfare and Development Office, uban sa hugot nga suporta sa Zuellig Family Foundation – The Challenge Initiative, Department of Education – CDO, pribadong sektor, ug uban pang mga ahensya ang halapad nga kampanya sa mga tinun-an ug kabatan-onan aron malikay sa sayo nga pagmabdos ug uban pang bisyo. .
 
Gani sa milabay’ng bulan, mismo si Mayor Klarex ang personal nga makigdayalogo ug mihangyo sa mga ginikanan atol sa barangay flag raising nga salmotan niini nga panggaon ug atimanon ang ilang mga anak aron dili malambigit sa unsa man nga illegal nga binuhatan ug malikay usab sa sayo pagmabdos nga maoy usa sa mga hinungdan sa kalisod sa pamilya.
 
Sa iyang kabahin, gipunting ni City Health Officer ug Information and Service Delivery Network co-chair Dr. Rachel Daba-Dilla, nga gumikan sa aktibo ug functional ang mga miyembro sa ISDN, mas han-ay ang pagpatuman sa programa sa kabatan-onan ug ISDN chairman usab nga si Mayor Klarex ang mismong gapangunay sa kampanya batok teenage pregnancy.
 
Lakip sa giduaw sa grupo ni Malungon Mayor Constantino ang mga teen centers sa Bayabas ug Carmen National High School, ingon man ang adolescent friendly health facility sa barangay Canitoan. (AGP/Photos by Kim Zaldivar)