Friday, 14 April 2023 01:16

PAG-PROFILE SA MGA SIDEWALK VENDORS SA CARMEN MARKET, GISUGDAN NA

Written by
Kapin 160 na ka mga sidewalk vendors diha sa Carmen Market ang na-profile sa mga kadagkuan sa City Economic Enterprises and Business Development Administration (CEEBDA) human gisugdan ang kalihokan niadtong adlaw’ng Martes, Abril 11, 2023.
 
Sa iyang report atol sa regular meeting sa Night Market Management Committee nga gidumala sa co-chairman nga si kanhi Kagawad Enrico Salcedo, gipasabot ni Carmen Mkt Manager Sean Molig nga ang maong mga sidewalk vendors anaa kini namaligya sa dalan V. Castro ug Ipil.
 
Matud niya nga padayonon pa nila ang pag-profile sa mga sidewalk vendors nga nagplastar sa lain nga mga dalan sa Carmen Market.
 
Una nang gipadayag ni Mayor Rolando `Klarex’ Uy nga dili lang ang mga sidewalk vendors sa Cogon Market ang iyang plastar apan lakip na sa ubang merkado sa tinguha nga mahapsay usab ang dagan sa trapiko sa palibot sa merkado sa Carmen.
 
Gani, gisulti ni Mayor Klarex nga human sa Cogon Mkt. isunod na ang merkado sa Carmen. (ALR/CIO) Photos from CEEBDA