Thursday, 20 April 2023 05:08

PAGSULBAD SA MGA REKLAMO SULOD SA PUEBLO BUSINESS PARK NAUYONAN SA RCB, PODC

Written by
Sa tinguha nga masulbad ang reklamo batok pagpatukar sa kusog nga musika, motorsiklo ug mga sakyanan nga nakapadisturbo sa mga residente, nagtagbo bag-ohay lang ang mga kadagkuan sa Regulatory Compliance Board (RCB) ug mga restobar operators sa Pueblo Business Park, uban sa kapulisan sa Police Station 4, ug Pueblo de Oro Development Corp.
 
Ubay-ubay na nga reklamo ang nadawat sa RCB sa pagpangulo ni Atty. Jose Edgardo Uy kalabot sa maong problema ug makadaghan na usab kini giaksyonan sa Inspectorate Team sa RCB apan wala gihapon kini nasulbad.
Kanunay gipahinumduman sa RCB ang mga restobar kalabot sa existing City Ordinance nga nagdili sa pagpatukar og kusog sugod alas 12:00 sa tungang gabii paingon sa alas 5:00 sa buntag.
 
Nunot niini, niuyon ang mga restobar operators nga hunongon ang kusog nga sounds pag-abot sa alas 10:00 sa gabii matag Domingo ngadto sa Huwebes, ug alas 11:00 sa gabii sa Biyernes ug Sabado.
Pagsunod usab kini sa memorandum nga gipagawas sa PDOC ngadto sa mga restobar operators.
 
Samtang hisgutan usab sa Cagayan de Oro City Police Office (COCPO) ang mahitungod sa kasaba sa mga motorsiklo ug car shots gawas sa Business Park.
Alayon niini, gipasalamatan sa RCB si Mr. Chrysler Acebu nga maoy nag-facilitate ug nag-host sa malampuson nga panagtigom. (ALR/CIO/Photos from RCB)