Wednesday, 03 May 2023 08:06

PAGGIYA SA GINIKANAN SA ILANG ANAK MAHINUNGDANON ARON DI SAYO MAGMABDOS – MAYOR KLAREX

Written by
SUBLING gipahinumdoman ni Mayor Rolando ‘Klarex’ Uy ang kamahinungdanon sa paggabay sa mga ginikanan aron malikay ang kabatan-onan sa sayo nga pagmabdos o ‘early pregnancy’.
 
“Anugon kaayo ang usa ka teenager nga mahimong ginikanan nga dili pa siya andam. Dili pa siya andam sa iyang pisikal, dili pa siya andam mentally kay bata pa siya, ug labaw sa tanan, ang iyang kaugmaon nga dili siya makahuman, makatiwas sa pagtungha”, pamahayag ni Mayor Klarex atol sa flagraising sa city hall niadtong Lunes.
 
Dumduman mismo si Mayor Klarex ang gakanaog sa kabarangayan aron makig-dayalogo ug personal nga mohangyo sa mga ginikanan aron maggiyahan ang ilang mga anak nga malikay sa suliran sa ‘early pregnancy’, ingon man usab ang paglikay sa dautang mga bisyo.
 
Ang administrasyon ni Mayor Klarex pinaagi sa Community Improvement Division, City Health Office, City Social Welfare and Development Office, Oro Youth ug uban pang buhatan, kauban ang nasudnong ahensya sa Commission on Population and Development ug Department of Social Welfare and Development hugtanong misuporta sa kampanya ug programa batok teenage pregnancy.
 
Lakip sa gisuportahan sa syudad ang Social Protection Program for Adolescent Mothers and their Children (SPAMMC) sa POPCOM ug DSWD, diin adunay 50 ka mga benepisyaryo nga ‘teen mothers’ gikan sa barangay Bayabas, Lapasan, Gusa, Camaman-an, Indahag, Bayanga ug Mambuaya.
 
Gani sa milabay’ng semana, nahatagan sa syudad og pinansyal nga ayuda alang sa first quarter nga nagbalor sa P500 matag bulan ang 50 ka mga benepisyaryo gikan sa nahisgutang mga barangay.
Ubos sa programang SPAMMC, ang mga benepisyaryo kinahanglang motuman sa mga kondisyon sa responsible parenthood, likayan ang ‘repeat pregnancy’ ug makapadayon sa pag-eskwela ug aktibong pagsalmot sa mga educational sessions. (AGP/Photo courtesy of CID)