Thursday, 25 May 2023 06:25

BAG-ONG BULUA NAT’L HIGH SCHOOL GISUBHAN NA

Written by
GISUBHAN na karong adlawa, Mayo 25, ang 4 storey, 16 classroom Bulua National High School nga gipangulohan mismo ni Mayor Rolando “Klarex” Uy sa Brgy Bulua ning syudad.
Ang P76.4-million nga classroom building pinasahi sanglit kompleto na kini sa multi-media package alang sa kasayon sa mga estudyante ug mga magtutudlo.
 
Ang maong tunghaan maoy labing una sa daghan nga mga school buildings nga tukoron ubos sa administrasyon ni Mayor Klarex ubos sa iyang RISE agenda.
 
Matud ni Mayor Klarex, aduna usab kini functional alarm system alang sa seguridad sa mga anaa sulod sa tunghaan, ingon man lakip sa package ang pipila ka mga lingkoranan alang sa mga left-handed students.
Sa mensahe sa mayor, iyang gipasalamatan ang mga magtutudlo sa ilang kakugi ug gidasig niini ang mga ginikanan nga kanunay’ng suportahan ang mga kabataan sa ilang pagtuon.
 
Nasayran nga adunay 54 classroom shortage ang Bulua National High School alang sa 4,300 ka mga estudyante nga kasamtangang nagamit sa 48 ka classrooms ug nakasinati sila og double shift sulod na sa taas nga panahon. (ACM/Photos by Roel Felicitas & Jomar Figuracion/CIO)