ALERTONG mitunol og ayuda ang City Social Welfare and Development (CSWD) Department-Disaster Response Team alang sa mga pamilya nga nasunogan sa Sitio San Roque, Lapasan ug Block 3 Puntod, adlaw’ng Martes, Enero 6, diha sa ilang tagsa-tagsa ka barangay hall, ning siyudad.

 

Lakip sa ayudang gitunol sa matag pamilya ang food packs, hygiene kits, kitchen utensils, mosquito net ug sleeping linens.

 

Gawas sa non-food items, midawat usab og pagkaon ang mga fire survivors pinaagi sa community kitchen nga gi-andam sa barangay council sa maong mga barangay.

 

Sumala sa inisyal nga datos sa CSWD Department Disaster Team, mikabat og 35 ka pamilya ang apektado sa sunog sa Sitio San Roque, Barangay Lapasan samtang 4 usab ka pamilya sa Block 3, Barangay Puntod.

 

Gani, gi-awhag ang mga nasunogan nga wala pa naka-adto sa barangay nga modiretso sa barangay hall aron ma-apil sa pag-profile sa CSWD ingon man sa assistance.

 

Ning panahon sa sunod-sunod nga kalamidad, gipahinumduman ang katawhan nga kanunay magbinantayon ug mahimong alerto aron malikayan ang sunog.

 

Alang sa gusto modonar, mahimong direktang magpadala sa evacuation site nga anaa nahimutang diha sa Barangay Lapasan hall. (NLB/CIO/photos courtesy of CSWD Disaster Response Team)