ACTIVATED ang City Disaster Risk Reduction and Management Council - Incident Management Team (CDRRMC-IMT) sa pagpangulo ni Incident Commander Nick Jabagat ug Cagayan de Oro City Police Office City Director Col. Dexter Paje isip Deputy Incident Commander alayon sa 'Feast of the Black Nazarene', sugod Enero 8 kutob Enero 9, 2026.

 

Laraw sa IMT activation nga magamit ang tanang rekurso sa syudad, mga nasudnong ahensya, volunteer groups, medical groups aron masiguro ang kaluwasan sa mga devotees, mga responders ug sa publiko sa tinuig nga pagpahigayon sa religious procession nga ipahigayon sayo sa buntag sa Enero 9 , ug uban pang kalihokan nunot sa kapistahan sa Senyor Jesus Nazareno.

 

Alayon niini mokabat sa 10 usab ka mga medical aid stations subay sa ruta sa prosisyon ang gi-andam aron makaresponde sa unsa mang emerhensiya ug insidente.

 

Nagpahinangno si Incident Commander Nick Jabagat nga taliwala nga adunay libreng lugaw nga gi-andam sa mobile kitchen sa syudad, mas maayo gihapon nga sigurohong insakto ang kaon aron dili makuyapan panahon nga magbaklay ug gihangyo usab ang mga adunay gihambing sakit sa lawas nga likayan nalang usa ang pag-salmot.

 

Atol sa press briefing adlaw'ng Martes, Enero 6, gihangyo usab ni City Councilor Roger Abaday, Chair sa Committee on Public Order and Safety ang suporta sa matag usa, mga devotees, sakop sa prensa ug publiko nga magtinabangay alang sa malampuson, malinawon ug luwas nga Traslacion.

 

(AGP/Photos by Kim Zaldivar/CIO)